នាព្រឹកថ្ងៃទី២៧ ខែកញ្ញា ឆ្នាំ២០២៦ ឯកឧត្តម សែម រតនា ប្រធានក្រុមការងាររាជរដ្ឋាភិបាលចុះមូលដ្ឋានស្រុកបន្ទាយស្រី បានដឹកនាំក្រុមការងារចូលរួមកាន់បិណ្ឌវេនទី១
បាននាំយកទេយ្យទាន និងថវិការបស់ ឯកឧត្តម នាយឧត្តមសេនីយ៍ ទៀ សីហា ឧបនាយរដ្ឋមន្រ្តី រដ្ឋមន្ត្រីក្រសួងការពារជាតិ និងលោកជំទាវ ទៀង អេង ទៀសីហា ប្រគេនដល់ព្រះសង្ឃដែលគង់ចាំព្រះវស្សា នៅវត្តចំនួន៦ ក្នុងស្រុកបន្ទាយស្រី ខេត្តសៀមរាប រួមមាន៖ វត្តភ្នំព្រះទេវៈ, វត្តនាគខ្មៅ, វត្តប្រាសាទនាគគូរ, វត្តចំបក់បីដើម, វត្តស្រះដូនរីក និងវត្តតាពេន។
ក្នុងឱកាសនោះដែរ ឯកឧត្តម សែម រតនា បានមានប្រសាសន៍ លើកឡើងថា វិស័យអាណាចក្រ និងពុទ្ធចក្រនៅកម្ពុជា តែងតែដើរទន្ទឹមគ្នា និងមិនអាចខ្វះមួយណាបានឡើយ។ វិស័យព្រះពុទ្ធសាសនាអាចរីកចម្រើនលូតលាស់ទៅបាន គឺអាស្រ័យដោយប្រជាពុទ្ធបរិស័ទមានជីវភាពល្អប្រសើរ និងបានរស់នៅក្នុងប្រទេសដែលមានសុខសន្តិភាពពេញលេញ ដែលធ្វើឱ្យប្រជាពលរដ្ឋមានឱកាសបានបំពេញបុណ្យកុសលតាមកាលវេលា និងតាមគន្លងប្រពៃណីដូនតាដោយគ្មានក្តីបារម្ភ។ ឯកឧត្តមបានបន្ថែមថា ដោយសារតែកត្តាសុខសន្តិភាពនេះហើយ ទើបធ្វើឱ្យគ្រប់វិស័យមានការរីកចម្រើនទៅមុខឥតឈប់ឈរ ទាំងនៅទីក្រុង និងនៅជនបទ។
ឯកឧត្តមប្រធានក្រុមការងារបានបញ្ជាក់បន្ថែមថា ការចូលរួមកាន់បិណ្ឌជាមួយប្រជាពលរដ្ឋនាពេលនេះ ក្រៅពីដើម្បីឧទ្ទិសមគ្គផលជូនដល់ដូនតា និងញាតិសន្តានដែលបានចែកឋានទៅហើយនោះ ក៏ដើម្បីឧទ្ទិសកុសលជូនចំពោះវិញ្ញាណក្ខន្ធវីរកងទ័ពកម្ពុជាទាំងអស់ ដែលបានពលីជីវិតក្នុងបុព្វហេតុការពារបូរណភាពទឹកដី និងជាពិសេសដើម្បីឧទ្ទិសមហាកុសលថ្វាយចំពោះព្រះមហាវីរក្សត្រខ្មែរគ្រប់ព្រះអង្គផងដែរ។
ជាមួយគ្នានេះដែរ លោក រិន ឡូត អភិបាលស្រុកបន្ទាយស្រី បានលើកឡើងថា ការដែលអាជ្ញាធរ និងប្រជាពលរដ្ឋបានជួបជុំគ្នាធ្វើបុណ្យទាននាពេលនេះ គឺដោយសារប្រទេសជាតិមានសុខសន្តិភាព និងមានការអភិវឌ្ឍជាបន្តបន្ទាប់។ លោកបានបន្ថែមថា ពិធីបុណ្យភ្ជុំបិណ្ឌនេះ ក៏ជាឱកាសដ៏ល្អសម្រាប់ថ្នាក់ដឹកនាំ និងប្រជាពលរដ្ឋបានជួបជុំ សំណេះសំណាល សួរសុខទុក្ខគ្នាទៅវិញទៅមក បន្ទាប់ពីមមាញឹកនឹងការងារបង្កបង្កើនផលស្រែចម្ការ ព្រមទាំងបានកត់សម្គាល់អំពីការផ្លាស់ប្តូរអាកាសធាតុក្នុងរដូវភ្ជុំបិណ្ឌនាពេលបច្ចុប្បន្ន ដែលមានលក្ខណៈប្រែប្រួលខុសពីមុនផងដែរ។
ជាមួយគ្នានេះដែរ លោក រិន ឡូត អភិបាលស្រុកបន្ទាយស្រី បានគូសបញ្ជាក់ថា ការដែលអាជ្ញាធរមូលដ្ឋាន រួមជាមួយប្រជាពលរដ្ឋទាំងអស់ បានរួមសាមគ្គីជួបជុំគ្នាធ្វើបុណ្យទានបាន ដោយសារកត្តាសុខសន្តិភាព និងការអភិវឌ្ឍលើគ្រប់វិស័យដែលប្រទេសជាតិយើងកំពុងទទួលបាន។ លោកអភិបាលស្រុកបានបន្ថែមថា បុណ្យភ្ជុំបិណ្ឌដែលជាប្រពៃណីដ៏ថ្លៃថ្លារបស់ជាតិ គឺជាឱកាសដ៏ប្រពៃសម្រាប់ថ្នាក់ដឹកនាំ មន្ត្រីរាជការ និងប្រជាពលរដ្ឋ ក្នុងការជួបជុំគ្នា សំណេះសំណាល និងបង្កើនភាពជិតស្និទ្ធរវាងអាជ្ញាធរ និងប្រជាពលរដ្ឋ។
សូមបញ្ជាក់ផងដែរ ក្រុមការងារក៏បាននាំយកទេយ្យទាន និងថវិការបស់ ឯកឧត្តម នាយឧត្តមសេនីយ៍ ទៀ សីហា ឧបនាយរដ្ឋមន្រ្តី រដ្ឋមន្ត្រីក្រសួងការពារជាតិ និងលោកជំទាវ ទៀង អេង ទៀសីហា ចែកទានជូនដល់យាយជី តាជី ចំនួន១០០នាក់ ដោយក្នុងម្នាក់ៗទទួលបានថវិកា ក្រមា និងក្រណាត់សផងដែរ។
អត្ថបទ និងរូបភាព : លោក ទុំ សាមុត
កែសម្រួល: លោក ហាំ ម៉េងហួត











